Maria Txibite Nafarroako presidentea Berdintasunerako Departamentu arteko Batzordeko buru izan da ostegun honetan. Bertan, Foru Gobernuak jakinarazi duenez, 2023rako emakumeen aurkako Indarkeriaren Ekintza Planeko programa onartu da eta 2022 Berdintasunerako Plan Estrategikoaren (BPE) jarraipen-txostena aurkeztu da.
Bileran, Txibitek adierazi du "funtsezkoa" dela datozen urteetan berdintasun politiken bultzadari eustea eta "hasitako bide honek atzera bueltarik ez izatea". Halaber, Batzordeak legegintzaldi honetan egindako lana eskertu du, baita "berdintasun-politikak ikuspegi kolektibo, zeharkako eta anitzetik aplikatzeko duen uste sendoa" ere.
Berdintasunerako Departamentu arteko Batzordea
Nafarroako Gobernuaren Berdintasunerako Departamentu arteko Batzordea 2017an sortu zen kolaborazio, lankidetza eta koordinazio organo gisa, berdintasun printzipioa integratzeko hala nola Foru Administrazioaren politika guztietan emakumeenganako indarkeria errotik ezabatzeko.
Bere eginkizun nagusiak honako hauek dira: "emakumeen eta gizonen berdintasunaren arloan dagoen araudia bete dadin bultzatzea; emakume nafarrek bizi duten desberdintasun-egoerari aurre egiteko eta gainditzeko komenigarritzat jotzen diren neurri guztiak ezagutu eta babestea, eta Nafarroako Gobernuko sail guztietan genero zeharkakotasuna ezartzeko estrategia garatzeko beharrezkoak diren baliabideak aztertzea eta proposatzea".
