Bi gol jaso zituen oso denbora gutxian

Juan Kruz Lakasta Zubero 2023ko api. 17a, 07:50
  • Hiru minutuan kontzentrazioa galduta hiru puntu galdu zituen Osasunak, Rayo Vallecanoren aurka.
  • Gizonezkoen Osasunak bi eta bat galdu zuen ostiralean, Rayo Vallecanoren aurka, Pailazo Fofo karrikako futbol zelaian jokaturiko norgehiagokan.
  • Porrot horren ondotik, gorritxoak hamargarren postura jaitsi dira sailkapenean. Jaitsieratik hamaika puntura daude, Europatik bostera.

Bernardo Atxagak idatziko lukeen moduan, Osasunak bi gol jaso zituen oso denbora gutxian. Lehen zatiko azken txanpako hiru minutu fatidikotan bi gol jaso zituen: 39.ean, Aridanek bere atean gola sartu zuen; 42.ean, Isi Palazonek Rayoren bigarrena erdietsi zuen, gorritxoek gaizki defendaturiko beste jokaldi batean.

Kopako finala gogoan, Arrasatek koktel berezia osatu zuen hasierako hamaikakoan. Minutu asko jokatu dituzten jokalariak aukera gutxiago gozatu dituztenekin uztartuz: erdiko atzelari bezala, Unai Garcia eta Aridane; euskarrian, Moncayola; zelai erdian Ibañez, Aimar eta Barja gazteak; ezker hegalean, Abde izarra; puntaren puntan, Kike Garcia.

Anabasak ez zuen ongi funtzionatu. Nolanahi ere, bigarren zatian, Moi Gomezen zelairatzeak beste bizitasun bat eman zion Jagoba Arrasateren taldeari. Moik berak gol ederra sartu zuen 65. minutuan.

Berpizkundea hel zitekeela zirudien, edo sikiera berdinketa, baina Rayok ederki kudeatu zituen norgehiagokako azken minutuak, jokoa trabatuz.

Kirola Nafarroa

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!