Andosillako industria pabiloi bateko teilatuan lanean zegoen 54 urteko gizon bat hil egin da gaur goizeko 10:00ak inguru, erori ostean. Larrialdi zerbitzuetako medikuak eta suhiltzaileak eta Polizia bertaratu dira istripura baina medikuek ezin izan dute ezer egin langilearen bizitza salbatzeko. Istripuaren arrazoiak oraindik argitu gabe daude eta Foruzaingoak ikerketa abiatu du kasua argitzeko.
Nafarroako CCOO sindikatuak deitoratu du istripua eta "Lan Arriskuen Prebentziorako Legea osorik betetzeko ahaleginak areagotzea" eskatu du. Sindikatuak zehaztu duenez, Errioxan finkatutako enpresa bateko kidea denez, gertaera ez dela lan-istripu hilgarri gisa zenbatuko Nafarroako zifretan. Hala ere, "gaurko heriotza, eraikuntzaren gremioan, egun beltz berri bat da Nafarroan eta Estatu osoan ezbehar-kopuru kezkagarriak dituen sektore batean", nabarmendu du CCOOk.
Era berean, LAB sindikatuak “hain ohikoa den lan-istripu baten aurrean” berriro gerta ez dadin beharrezko bitartekoak ez jartzea “onartezina” dela salatu du. "Lan Ikuskaritzak, Nafarroako Lan Osasunaren Institutuak eta Gobernuek ez dutela horrelako jarduerarik kontrolatzen" “agerikoa” dela adierazi du LABek.
