Aingeru Zudaire larri zauritzeagatik, Espainiako Poliziaren kontra Auzitegi Nazionalak ebatzitako zigorra irmoa da. Azaroan egin zen publiko eta ez da helegiterik izan. 100.000 euroko kalte ordaina emateko agindu dio Espainiako barne ministerioari, egindako oinazeagatik. Gomazko pilota batekin zauritu zuten Aingeru Zudaire, 2012an. Hamar urteko borroka judiziala izan da, eta tarte horretan jasotako sustengua eskertu du ekitaldi batean Zudairek.
Auzitegi Nazionalak aitortutakoa “motz” geratzen dela salatu dute, hala ere. Alde batetik, estatu espainiarra zigortzen du, poliziaren jokabidearen arduradun moduan, baina ez du pilotakada, distantzia laburrean eta burura apuntatuta jaurti zuen poliziarik zigortzen. Zudairek begi bat galdu zuen tiroaren ondorioz. Bestetik, Aingeru Zudaire poliziaren biktima gisa aitortua izan dadila eskatu dio Ojo Plataformak Nafarroako Gobernuari, eskuin muturreko taldeek edo funtzionario publikoek eragindako motibazio politikoko ekintzen biktimei aitortza eta erreparazioa ematekoa oinarri hartuta.
Gomazko piloten eta antzekoen erabilera debekatzea ere galdegin du ekimenak. Espainiako Poliziak eta Guardia Zibilak, gomazko balak erabiltzen ditu egun. Foruzaingoak, berriz, foam jaurtigailuak, 2016tik.
