Osasunak hutsean berdindu du Celtaren kontra, bart Sadarren jokaturiko norgehiagokan. Horren ondotik gorritxoak zortzigarrenak dira sailkapenean, 34 punturekin, eta Europako postuetatik hiru puntura daude.
Partiduaren hasieran, Budimirrek jaurtiketa gurutzatua egin du area barrutik. Norgehiagokaren amaieran, Rober Ibañezek buruz egin du errematea, ahoko zuloan. Batean zein bestean, alta, Celtako atezain Ivan Villarrek meritu handiko geldiketak egin ditu.
Nolanahi ere, gorritxoek Villar gainditzea lortu dute, behin. Abderen erdiraketa ezker hegaletik. Chimyren imintzioa errematea egiteko baina baloia ukitu gabe. Eta pilota sareetara. VARak baliogabetu egin du, Avila jokoz kanpo zegoelakoan. Haatik, marrak finkatzeko tenorean argentinarraren ukondoa hartu du erreferentziatzat, eta ez sorbalda. Gauzak horrela, Osasunak azalpenak eskatu dizkio Arbitroen Batzorde Teknikoari.
Partidaren amaieran, Jagoba Arrasatek zalantzak azaldu ditu VARak eskainitako irudiarekin. “Irakaslea naiz eta zerbait badakit geometriaz. Agian jokoz kanpokoa dela? Bai. Erakutsi diguten irudia gaizki dagoela? Ere bai”.
Berriatuko entrenatzaileak partidua irabaztearen aldeko apustua egin du, hasieratik Moi Gomez, Aimar Oroz, Ez Abde, Ante Budimir zelairatuz. Seguru asko horregatik, berdinketak zapore gazi gozoa utzi dio: “Gol aukerak sortzea kosta zaigu, eta sortu ditugun bizpahiru horiek ez ditugu aprobetxatu. Gainontzean, Celta baino gehiago izan gara. Defenditzen aritu dira partidu osoa. Gauzak ongi egin ditugun seinale”.
Hurrengo norgehiagoka Valentziaren aurka jokatuko du Osasunak, Mestallan, larunbatean, 21:00etan.
