Datorren asteartean bilduko dira Nafarroako Gobernua eta Osasunbideko LAB, SAE, UGT, ELA eta CCOO sindikatuek osatzen duten greba batzordea. Atzo jaso zuten bilera deialdia Osasun departamentutik, eta gaur bildu dira gobernuaren proposamena lantzeko.
Funtzio Publikoko Javier Remirez kontseilariarekin bildu nahi dute, ez Osasun zuzendari nagusi Carlos Artundorekin. Ez dakite nor egonen den bileran, baina jarrera aldaketa bat sumatu dute gobernuarengan. Esklusibitatearen ezabapena negoziaziotik kendu dute, eta proposamen berri bat jaso dute negoziatzen hasteko.
"Engainatuta" sentitzen dira sindikatuak. Dirurik ez dagoela esan izan die orain arte departamentuak, baina Medikuen Sindikatuarekin 400 euroko soldata igoera adostu du. Dagoen dirua denen artean banatu dadin eskatuko diote.
Grebaren eguna iritsi bitartean, Osasun sistema publiko unibertsala eta bakarra aldarrikatuko dute sindikatuek Nafarroako Osasun Plataformarekin batera. Elkarretaratzeak eginen dituzte martxoaren 15ean osasun etxe eta ospitale guztietan; eta 18an, berriz, manifestazioa, Iruñean. Martxoaren 23an izanen litzateke greba, baina itxaropena dute ez dela beharrezkoa izanen.
