Nafarroako Gobernuak, Sodenaren bidez, eta Nordex enpresak 30 milioi euro inbertituko dituzte "teknologia propioa" duten elektrolizatzaileak garatzeko, "hidrogeno berdea ekoizteko". "Elektrolizatzailearen prototipo bat sortzea da kontua, ondoren garatzeko eta industrialki jaurtitzeko", azaldu du Maria Txibite gobernuko presidenteak.
Adierazi duenez, Nafarroa hidrogeno berdearen alde egiten ari den apustuarekin jarraitu nahi dute, "hainbat proiektutan gauzatzen ari baita". "Proiektu hau beste urrats bat da sektore energetiko berri honen balio katean", azaldu du . "Hidrogeno berdea ekoizteaz gain, ekoizteko makinen diseinua eta fabrikazioa hemen ere egin nahi ditugu".
Presidenteak adierazi duenez, duela 30 urte Nafarroa parke eolikoak jartzearekin konformatu ez eta aerosorgailuak diseinatzen eta fabrikatzen hasi zen bezala, orain hidrogeno berdea ekoizpen propioarekin fabrikatzen lideratu nahi dute. Esan duenez, alde bakoitzak 15 milioi euro jarriko ditu.
35 profesionalek osatutako ingeniaritza-talde batek diseinatu eta probatuko ditu elektrolizagailuak, eta "ondorengo fase batean, industriaren hedapenerako jauzia egingo da". 150 enplegu zuzen inguru aurreikusten dira bertan.
