BSH Ezkirotzeko zuzendaritzak 2023an Aldi Baterako Enplegu Erregulazioko Espedientea aplikatzeko erabakiaren berri eman dio enpresa-batzordeari, etxetresna elektrikoen salmentak behera egin duela eta stocka gehiegizkoa delako argudiatuta.
Bosch, Balay, Siemens eta antzeko markekin lan egiten dute plantan. Bertako enpresa batzordeak agerraldia egin du lantegiaren aurrean, 2021eko udazkenean hasitako hitzarmen kolektiboaren negoziazioetatik eratorritako egoera azaltzeko. Langileek salatu dute iazko ekainean, "enpresa batzordearen gehiengoarekin aurreakordio batera iritsi zenetik zuzendaritzak jarrera immobilista" izan duela eta plazaratu duen asmo berriarekin "inboluzionatu" egin duela bere proposamenetan. Akordio hori langileek errefusatu zuten.
Multinazionalak bere aldetik ez du zehaztu espedienteak zenbat langileri eta zein baldintzatan eragingo dion. Datorren astelehenean aurkeztuko dute hori, eta iragarri du hitzarmen proposamen bat aurkeztuko diela langileei.
Langileek kritikatu dute, halaber, soldatak %4,75 baino ez direla igo azken 12 urteetan, eta aldi horretan inflazioa % 25 baino gehiago igo dela. Gogorarazi dute enpresak etekin ekonomikoa izan duela azken urtean.
Enpresa batzordeko kide guztiek UGT izan ezin egin dute salaketa, hau da LAB, CCOO, ATISS, ELA eta Solidari.
