Azaroaren 14tik, aurkezpena egin zutenetik, hamahiru erregistro eskaera aurkeztu dira Espainiako patenteen erregistroan Irulegiko Eskua izena, Sorioneku mezua edo eskuaren diseinua bere egiteko. Ondare publikotzat duen aurkikuntza arkeologikoaren “pribatizaziotzat” hartu ditu Nafarroako Gobernuak erregistro saiakerak, eta horien aurkako kontrakotasuna aurkeztuko du.
“Arangureneko Udalaren nahia jarraituz, pribatizazioa ekiditeko, txosten juridiko bat eskatu zuen kultura departamentuak”, azaldu du Rebeca Esnaola kontseilariak. Txostenean jasotako gomendioak jarraituz, atzo aurkeztu zuten lehenengo aurkakotasuna Espainiako patenteen erregistroan. Nafarroako Gobernuak Irulegiko eskuaren jabetza eskubideak dituela eta aurkeztu duten diseinuak berrikuntzarik ez duela argudiatu du exekutiboak.
Erabilera askea eman nahi diote aurkikuntzari, azaldu dutenez. Baina era berean, eskuaren diseinuaren, izenaren eta mezuaren erregistroa aurkeztu du gobernuak. “Helburua ez da erregistroa lortzea, aurkakotasunek aurrera jarraitzen badute eta beste erregistroak gertatzen ez badira, atzera eginen dugu gure eskaeran”, zehaztu du kontseilariak.