Nafarroako Gobernuak oniritzia eman dio Mañeru eremu mistora pasatzeko lege proposamenari. Aho batez egin zuen eskaera Mañeruko Udalak. Baina Nafarroako Parlamentuan horma bat topatuko du eremu mistoaren zabalpenak. PSNk eta Navarra Sumak kontra bozkatuko dute. “Ez da unea”, esan dute Ramon Alzorrizek eta Carlos Perez Nievasek.
Hauteskundek gertu daudela jarri du aitzakia parlamentari sozialistak: “Aurki gehiengoak aldatuko dira”. Hala ere, hurrengo legegintzaldian osatzen den udalak berriro eskatuko balu zer eginen luketen galdetuta ezezkoan mantendu da. “Ikusi beharko dugu zeinek eskatzen duen”.
Navarra Sumak bat egin du sozialisten iritziarekin. “Eskaera egin duten udalbatzako asko seguru aski ez dira euskaraz mintzatzen ere”, argudiatu du Carlos Perez Nievas parlamentariak. Udalbatzaren aho bateko eskaera ez da adostasun nahikoa Ciudadanosekoarentzat Euskararen legea aldatzeko.
