Kaleratzeak izanen direla baieztatu du Siemens Gamesako buruak

Iragarritako kaleratzeekiko "kezka" azaldu du presidenteak multinazionaleko buruarekin eta Irujo kontseilariarekin eginiko bileran. 

Maria Txibite Nafarroako Gobernuko presidenteak bilera egin du ostegun honetan Jochen Eickholt Siemens Gamesako kontseilari delegatuarekin, Nafarroako Jauregian. Bileran, presidenteak "konpromisoa" eskatu dio enpresa buruari Foru Erkidegoan dituen langileekiko, eta kezkatuta agertu da konpainia egiten ari den "berregituraketa prozesuarekin".

ELA, UGT eta CCOO sindikatuek konpainiak proposatutako kaleratzeen aurkako protesta deitu duten egunean, Jochen Eickholt Siemens Gamesako CEOa Iruñera bertaratu da Nafarroako Gobernuarekin bilera bat izateko. Kontseilari delegatuak Exekutiboaren aurrean ziurtatu duenez, enpresak Nafarroan jarraituko du etorkizunean, baina ez du nahi izan hartu egungo langile kopuruarekiko konpromisorik; izan ere, joan den urrian irekitako prozesuan kaleratze horiek beharrezkoak direla berretsi du.

Hitzordua enpresa eta erakunde publikoen arteko bilera egiten zen unean bertan, Siemens Gamesako Sarrigurengo langileak kalera atera dira, enpresari hurrengo bost urteetarako enplegu-bermea eta lan-baldintzak hobetzea eskatzeko, soldatak handituta, gainerako langileen antzeko lanbide-kategoriak aplikatuta eta osasun mentala zaintzeko neurriak hartuta.