Handien modura irabazi zuen Osasunak Vigon. Erran nahi baita sarri ikusi izan dugula talde handi bat erdipurdiko partidua eginda Sadarretik hiru puntuak eramaten. Eta gorritxoek horixe egin zuten Balaidosen, Tximi Avilaren bi gol eder eta Aitor Fernandezen beste horrenbeste geldiketa lagun.
Jagoba Arrasatek etxean Valladoliden aurka garaipena erdietsi zuen hamaikakoa errepikatu zuen. Eta hasi eta berehala, zortzigarren minutuan, haizea alde jarri zitzaion, Chimy Avilak ezerezetik sortu zuen golari esker, area ertzetik jaurtiketa zitala eginez.
Celtak berdinketa lortu zuen, Iago Aspasen goltzar baten bitartez. Haatik, atsedenaldira joan aurretik Avilak gorritxoen bigarrena egin zuen, buruz, urrutitik, meritu handiz.
Bigarren zatian Celta gehiago izan zen Osasuna baino, jokoan zein gol aukeretan. Arrasateren taldeari sufritzea egokitu zitzaion. Alta, Aitor Fernandezek eutsi zion, eutsi zionez.
Futbolaren lege fisiko zaharrak gailendu ziren: Osasunak goranzko inertzia du, eta Celtak beheranzkoa.Gorritxoek irabazi zuten.
Inoizko liga hasierarik onenetakoa egiten ari dira gorritxoak. Soilik 2005-2006 denboraldian egin zuten hobea, Javier Agirrerekin.
Osasunak bihar jokatuko du Munduko Txapelketaren aurkako azken Liga partidua, Barçaren aurka, Sadarren, gaueko bederatzi eta erdietan.