Uztailean erregistratu zituzten herriko San Miguel eskola publikoan, 2023-2024ko ikasturtetik aurrera euskaraz ikasteko instantziak, baina oraindik ez dute erantzun ofizialik jaso. Hezkuntza zuzendari nagusi Gil Sevillanorekin batzartuko dira bihar, auziaz galdetzeko. Hamabi familiak egin dute eskaera.
“Otsailean aurre matrikulazio epea da, eta gertatu daiteke gobernuak esatea eskola mapa arautzen duen dekretua aldatu behar dela eskaerari erantzuteko”, azaldu du Behatokiko zuzendari Agurne Gaubekak. Mendigorrian egin bezala, argudio hori erabiltzen badute, aldaketa ahalbidetzeko neurriak ezartzeko eskatuko dutela zehaztu du.
Herrian bertan eskola publiko bat izan arren, hainbat hamarkadatan, euskaraz ikasteko herritik kanpora joan behar izan dute. “Betiko dikotomian uzten gaituzte beraz, euskaraz ikasteko eskubidea dugula esaten zaigu baina gure eskubidea beti baldintzatua dago eta ezin dugu euskara berdintasunean ikasi”, salatu zuten atzo familiek, Larragan.
Familien esanetan, azken urteetan, herriko eskolaren matrikulazioak behera egin du eta euskarazko irakaskuntza lerroa irekitzeak eskolaren “biziraupena eta garapena” bermatu ditzake. “12 familiak D ereduaren irekiera eskatzea ez da norbanakoon eskari bat, ez eta kapritxo bat. Gure haurrez gaindi, gure atzetik etorriko direnen eskubideez ere ari gara. Herri honek euskaraz ikasi eta bizitzeko duen oinarrizko eskubideaz ari gara”, adierazi dute.