Hitzarmena berritu dute gobernuak eta Euskaltzaindiak

Nafarroako Gobernuak, Euskarabidearen bitartez, 190.000 euroko diru-laguntza emango dio Euskaltzaindiari

Ana Ollo Herritarrekiko Harremanetarako kontseilariak eta Andres Urrutia euskaltzainburuak bi erakundeen arteko lankidetza hitzarmena berritu dute 2022rako. Helburua euskara garatzen, ikasten eta ikertzen laguntzea da.

Aurten, bi proiektu nabarmendu dituzte. Batetik, Joakin Lizarragaren lexikoaren azterketaren emaitzak Mendaur Bilduman argitaratzea, azken urteotan Nafarroako Gobernuak finantzatu duen ikerketa-lan zabalari amaiera emateko. Bestalde, Euskaltzaindiaren parte-hartzea eta aholkularitza Etxauri Haraneko etxeen izenak biltzeko proiektuan, non iaz oikonimia lanetarako landutako esparru teorikoa aplikatuko den.