3.400 hektometro kubiko ur dago bilduta egun Ebroko arroko erreserbetan. Aurreko urteetan baino %12 gutxiago da, eta egoera kritikoa eragin du horrek Nafarroan. Ebroko Konfederazio Hidrografikoak jakitera eman duenez, Esako urtegiaren menpe dagoen Bardea “larrialdi egoeran” dago.
Urtegiaren %22,6 dago beteta, hau da, 100 hektometro kubiko ur ditu, eta litekeena da irailean behera egitea euri askorik egiten ez badu. Ramon Luquez Ebroko Konfederazio Hidrografikoko ustiapen-buruak adierazi duenez, ureztatze-kanpaina beste urte batzuetan baino lehenago amaitu beharko da, eta aurreikuspenen arabera, urtegia “ia erabat” hustuko da, ureztatzea dela eta.
Itoizko urtegia, berriz, %43an dago. 180 hektometro kubiko ur ditu, eta erreserba aurreko urteetakoa baino %5 txikiagoa da.
Urtegi txikiagoen egoera hobeagoa da. Luquezek adierazi du “normaltasunez” funtzionatzen dutela, haien edukieraren %60 inguru beteta baitute. Eugi % 61,3an dago; Urdalur %64,4an, 3,53 hektometro kubiko urekin; eta Allotz, 37,178 hektometro kubikorekin, %56an. Mairagak, berriz, 1,554 hektometro kubiko ditu, eta edukiera osoaren %67 du beteta.
