Asier Martinez: “Ez dut sinesten gertatutakoa”

Juan Kruz Lakasta 2022ko abu. 18a, 12:37
Asier Martinez domina irabazi berritan, senide eta lagunekin (Argazkia: European Athletics).
  • Zizur Nagusiko atletak urrezko domina irabazi zuen bart gauean Municheko Europako Txapelketan, 110 metroko hesidunean.
  • Zorion mezuak nagusi izan dira sare sozialetan, baina badira gogor kritikatu dutenak, irabazi eta gero Espainiako bandera ez zabaltzeagatik.

“Ez dut sinesten oraindik. Oso pozik nago”. Asier Martinezek hitzok behin baino gehiagotan errepikatu ditu, EITBk Munichen, garaipena erdietsi berritan egin dion elkarrizketan. Garaipenak are poz handiagoa eman dio, Pascal Martinot-Lagarde lehiakide izan duelako: “Nire idoloa izan da betidanik. Txikitatik egon naiz bere lasterketa guztiak jarraitzen. Hemen bere aurrean egotea niretzako dena da”.

Martinezen arabera, azken hilabeteotan egindako “lan guztiaren emaitza” da atzoko garaipena: “Oso denboraldi polita izan da niretzako. Lehiaketa guztietan oso maila onean egon naizela sentitu dut”. Atzo bere markarik onena gainditu zuen, 13’14 segundoan helmugaratuz, baina horri ez dio garrantzirik eman: “Marka berdin zait, txapelketetan postua irabazi behar da, eta hala izan da niretzako”.  

Europako Txapelketan faboritoa zen Martinez, lehiakideen artean urteko markarik onena baitzuen. Presio hori kudeatzea ez ei zaio erraza izan: “Oso tipo urduria naiz, agian kanpotik ez da sumatzen. Oso zaila izan da urduritasun hori guztia gestionatzea (…) Presio hori guztia gestionatzea ez da erraza izan, baina nire entrenatzailea, taldea, lagunak eta gurasoak hor izan dira”.

Sudur punta horregatik epaileek, photo finisha aztertu eta gero, garaipena eman ziotelarik, Martinezek amorru handiz egin zuen eztanda, oihuka: “Lau metrora nituen nire talde guztia, nire lagunak, nire gurasoak. Oso pozik nago”, errepikatu du.

Sare sozialetan hainbat zorion mezu jaso ditu. Besteak beste, Osasuna eta Union Tutera futbol taldeena, baita Espainiako presidente Pedro Sanchezena eta Nafarroako alderdi politiko guztiena ere.

Haatik, hainbatek gogor kritikatu dute, irabazi eta gero Espainiako bandera eman ziotelarik eskuan bildu zuelako, haiek nahiko zuketen moduan zabaldu beharrean.

Kirola Nafarroa

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!