Elkar aski ongi ezagutzen duten bi pilotari aurrez aurre arituko dira Labriten Promozioko Buruz Buruko txapelaren borrokan. Garaipena Alberdi zein Salaberriarentzat aurrerapausoa litzateke, hazkunderako tartea. Gainera profesionalen lehen mailako heldu den urteko txapelketan parte hartzeko aukera emango lieke.
Apirilean Zumaian jokatutako final-laurdenetako ligaxkan elkar ikusi zuten, Alberdik 22-16ko emaitzarekin lortu zuen garaipena. Partida nahiko parekatua izan zen, eta Azpeitiko aurrelaria hobeto aritu zen partidaren azken zatian. Baina, esan ohi den bezala orain gauzak aldatu egiten dira, finala baita hitzordua.
Alberdik txapelketa garbia argiten ari da, erosoa, ez du porrota ezagutzen eta faborito bezala, final-laurdenetako ligaxkako bere hiru partidak irabazi zituen Zubizarreta III, Salaberria eta Elordiren aurka, gero finalerdietan anaia txikiari 22-8 irabazi zion, beraz, jokoz eta konfiantzaz gainezka iritsiko da Iruñeko Labrit pilotalekura.
Bestalde, Salaberriak Elordi eta Zubizarreta III.ari irabazi zien final-laurdenetako ligaxkan, Alberdirekin galduta, eta gero finalerdia ez zuen jokatu Javier Zabala errioxarrak orkatilan izan zuen lesioagatik. Horregatik, ez du lehian aritzerik izan azken egunetan eta larunbatera arte itxaron beharko da hitzordura nola iristen den ikusteko.
Hitzordua larunbatean izanen da, arratsaldeko 17.15ean.