Garesko Txori haur eskolan hezitzailea da Narila Mondragon Ziarra. Hogei urte dira haur eskoletan lanean ari dela, eta guztietan topatu du egun bizi duena. Hamabi haur ditu bere kargura, urte eta erdiko hamabi haur: “Ikasten duguna ezin dugu praktikan jarri, ez garelako iristen. Bi esku, bi begi eta bi belarri ez dira nahikoa hamabi haur hezteko”.
Nafarroako Hezkuntza Departamentuaren aurrean kontatu du bere esperientzia, gaur. Hitzordua baitzuen erregistroan, haur eskoletako familiek bildu dituzten 30.000 sinadurak entregatzeko. Ezin eskertuago daude 0-3 Plataforman bildutako langileak gurasoen babesarekin: “Larunbateko manifestazioa izugarria izan zen, argi geratu da zein premia dagoen 0-3an zerbait egiteko”.
Oraindik ez dute ospatzeko moduko lorpenik eskuratu, diote plataformatik; baina Carlos Gimeno hezkuntza kontseilariaren diskurtsoan aldaketak sumatu dituzte. Ratioak altuak direla onartu zuen atzo, besteak beste. Gaur gaia lantzeko bilera du Udal eta Kontzejuen Federazioak, baina plataforma ez dute bilerara deitu.
