“Gerrei intsumisioa: Putin ez, NATO kanpora”. Hori da larunbatean Iruñeko erdiguneko karrikak zeharkatuko dituen manifestazioaren leloa. Deitzaileak, bere garaian intsumisioaren zein kontzientzi eragozpenaren mugimenduan parte hartu zuten pertsonak. Gaur, manifestaziora deitzeko prentsaurrekoa lau emakume antimilitaristak eskaini dute. Deialdiaren gibelean dagoen agiria dagoeneko 532 lagunek sinatu dute Hego Euskal Herrian. Horietatik 348 nafarrak dira. Estatuan beste 1.500 lagunek sinatu dute.
“Soldadutzaren edo Golkoko gerraren kontra borrokatu ginenok berriro gerraren aurka protesta egitera deitzen dugu”, iragarri du Argiñe Salanuevak. Argiñe Unai Salanueva zenaren arreba da. Unai intsumisoa zen eta bere buruaz beste egin zuen, espetxera itzuli behar ez izateko. “Sarraskia gelditu behar da”, gaineratu du Salanuevak. Gobernuei exijitu diete alde bateko zein besteko desertoreei asilo politikoa eman diezaietela, Ukrainara armak bidaltzearen kontra egin du eta gogor kritikatu du aurrekontu militarra handitu nahi izatea.