Ostegunetik aurrera, zergadunek renta.navarra.es webgunean kontsultatu ahal izango dituzte Nafarroako Foru Ogasunak egindako proposamenak, aurten 203.720 dira. Horietatik %67ri dirua itzuliko die. Guztira, 73,2 milioi euro itzuliko ditu ogasunak, apirilaren 20an.
Aitorpena egiteko hiru modu izanen dira aurten: on line, telefono bidezko eta aurrez aurrekoa. Internet bidezkoa izanen da martxan jarriko duten lehenengoa, ostegunetik izanen da erabilgarri. Kontrakoa esan bazuten ere, Cl@ve, NANa eta kodea edo ziurtagiri digitala erabili ahalko dira sartzeko.
Apirilaren 20ean, berriz, gainerako bi erak aktibatuko dira, eta bietan hitzordua hartu beharko da lehenik. Zita hartzeko epa apirilaren 13an zabalduko dute. Lehenengo urtea da telefono bidezkoa ezartzen dutela. Norberak eskatu behar du hitzordua, eta ogasuna jarriko da harekin harremanetan. Aurrez aurrekoa, berriz, Iruñeko, Tuterako, Lizarrako eta Tafallako Ogasuneko bulegoetan egin ahal izanen da.
Ekonomiaren alorrean, iazkoa 2020a baino urte hobea izan zela gogorarazi du sailburuak, baina pandemiak ere markatu zuela. Osasun-egoerak eta, aldi berean, egoera ekonomikoak bilakaera positiboa izan zuten, nahiz eta ondoz ondoko olatuek ez zuten ekonomia suspertzea ahalbidetu.