Auzitegiek EAko sektore kritikoari eman dio arrazoia, beste behin. Gasteizko lehen Auzialdiko 7 zenbakiko epaitegiak primarioen beste prozesu bat deitzera behartu du Eusko Alkartasuna, gehienez 15 eguneko epean. EAk primarioen erregelamendu berri bat egin behar duela ebatzi du, aurreko prozesuko akatsak zuzentzeko, Maiorga Ramirezen eskubideak urratu direlako. 2019ean irekitako auziari, “ibilbide beltzari”, amaiera eman diezaioken urratsa izan daiteke Ramirezen iritziz, “alderdiak demokrazia berreskuratu dezan”.
Alderdiaren kongresuak Eba Blanco, sektore ofizialeko burua, alderdiko idazkari nagusi izendatu eta bi astera iritsi da ebazpena, kritikoen kanporatzea gauzatu ondoren. Idazkari nagusiak izendatzeko primarioak ezabatu ditu prozeduratik zuzendaritzak, kongresu horretan. Azken ebazpenak kongresuari “zilegitasuna” kentzen diola uste du Ramirezek.
Zuzendaritzak, aldiz, dio "erabat indarrean" daudela duela bi asteko kongresuan hartutako erabakiak. Zuzendaritzak epaiaren aurka errekurtsoa jar dezake, baina honek ez luke etete-ondoriorik izanen. Gainera, errekerimenduan ohartarazten zaio ezen, agindutakoa adierazitako epean betetzen ez badu, betearazleak eskatu ahal izango duela kalte-galeren ordaina erreklamatzea.
