Iazko maiatzean bildu ziren lehenengoz negoziazio mahaian patronalak, Nafarroako Gobernua eta lau sindikatuak. Nafarroako adinekoen zentroen sektoreko lehenengo hitzarmen proposamena aurkeztu zuten langileen ordezkariek, patronalak, ordea, urtarrilera arte ez die ezer eskaini. “Urtarrilaren erdialdean lehenengo proposamena egon zen, justu lehenengo greba eguna egin eta bi egunetara edukitako bileran”, azaldu du Euskalerria Irratian Izai Bujanda ELAko kideak. “Oso proposamen eskasa da, oso urruti dago sindikatuok aurkeztutakotik. Lehenagotik ere garbi baldin bageneukan grebaren eraginkortasuna, borroka honetan oso garbi ikusi dugu”, gaineratu du.
Bihar bilduko dira berriro hitzarmenaren negoziazioarekin jarraitzeko, gaurko mobilizazioak baldintzatutakoa izanen dela ziurtatu du Bujandak. Soldataren igoera bat eskatzen dute sindikatuek, ratioen hobekuntzak eta ordutegietan egokitzapenak. Patronalak ez du bat bera ere onartu. “Eskainitakoa oso urria da, beraz, oraingoz ezin dugu ezin dugu esan akordiotik hurbil gaudenik”.
Eredu publiko doako eta unibertsal baten faltan, hitzarmena ezinbestekoa dela dio Bujandak. “Patronalaren eta Nafarroako Gobernuaren esku dago hau aurrera joatea ala ez. Taldeen postura ikusita edo orain arteko jarrera ikusita, esango genuke gaurkoa ez dela azkeneko greba eguna izango”.
12:00etan elkarretaratzea eginen dute, parlamentuaren atarian. 17:30ean manifestazioa izanen da, autobus geltoki zaharretik abiatuta.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!