Gaur goizeko bilkuran, Nafarroako Gobernuak Foru Administrazioko langileen ordainsariak %2 igotzeko akordioa hartu du, aurreko 2021ekoen aldean. Igoera horrek joan den urtarrilaren 1etik aurrera izango ditu ondorioak, eta otsailaren honetako nominan ordainduko da.
Foru exekutiboaren eledun Javier Remirezek prentsaurrekoan azaldu duenez, "2022rako Nafarroako Aurrekontuei buruzko Foru Legean eta 2022rako Estatuko Aurrekontuen Legean jasotako aurreikuspenak bete dira horrela".
Sindikatuek uko egin zioten Funtzio Publikoko Mahai Orokorrean igoera horri, erosteko ahalmena galtzea dakarrelako, inflazioak 2021eko ekitaldia %6,6an itxi ondoren Foru Erkidegoan.
Sindikatu guztiak bat etorri dira esatean igoera hori ez dela nahikoa iaz inflazioak gora egin ondoren. Gainera, azpimarratu dutenez, "Administrazioko langileek pandemian egindako ahalegina ez da islatzen ari jasoko duten soldatan".