4.170,4 milioi euro bilduta itxi du 2021. urtea Nafarroako Ogasunak, hau da, 2020. urtean baino %15 gehiago, pandemiak eztanda egin zuen urtean 3.627,1 milioi batu baitzituen.
Gobernutik, Elma Saiz Ogasun kontseilariak "izurriak eragindako ziurgabetasuna gainditu" dela, aurreko urtean baino 543,3 milioi euro gehiago bildu eta gero.
Ez hori bakarrik, 2021eko itxierako datuak pandemia aurreko urtekoekin alderatuz gero ere hobekuntza "esanguratsua" gertatu dela azpimarratu du Saizek, igoera % 5,8koa baita 2019 urtearekiko.
Aurreikuspenak beraz gainditu ditu iazko zerga-bilketak, izan ere 3.819,7 milioi euro jasotzea espero baitzuen Foru Exekutiboak, eta azkenean aurreikusi baino %9,2 gehiago bildu baitute. "Errekuperatzeko urtea" izan dela berretsi du Ogasun kontseilariak, "osasun arloko neurri murriztaileek eta hainbat arlotan gertatutako material eskasiak ezarritako zailtasunez harago".
"Albiste ona" dela adierazi du Elma Saizek "Foru Erkidegoaren zorpetzea murriztea ahalbidetuko" duelako.
