Hedadura ikaragarriko auzitzat definitu du Hitzarmen ekonomikoarena Uxue Barkosek. Geroa Baiko eledunak azaldu duenez, ez da gai puntuala, baina ez du gobernua kolokan jarriko. Hitzarmen ekonomikoaren legearen erreforman Ogasun departamentuak 67.2 artikuluan egindako moldaketa da gobernu kideen artean eztabaida eragin duena. “Autogobernuaren defentsa egin behar dugu, eta horren eskumenak parlamentuan mantendu”, adierazi du Barkosek. Gobernuarekin ez dute negoziaziorik abiatu oraindik, baina eledunak uste du epea badagoela oraindik akordio batera iristeko. Hitz egiteko prest azaldu da PSNko Ramon Alzorriz ordezkaria, eta gainerako taldeak desadostasunak albo batera uzteko gai izanen direla espero du: "Desadostasunen gainean akordioak egiteko gai gara".
Geroa Baik gaiaren inguruko galdera eginen dio ostegunean gobernuari, parlamentuko osoko bilkuran. Ez da gobernuak erantzun beharko duen bakarra izanen. EH Bilduk ere beste bat erregistratu du. Lege erreforma onartu dezaten haien babesa nahi badute, 67.2 artikulua erabakigarria izanen dela ohartarazi dio gobernuari Adolfo Araiz eledunak.