LABek COVID19aren eraginez konfinatutako haurrak zaintzeko baimenak orokortzeko eskatu du Nafarroako Parlamentuan. Eskaria erregistratu aurretik agerraldia egin du abertzaleen sindikatuak eta bertan Igor Arroyok, LAB sindikatuko Idazkari Nagusi ondokoak, egoeraren balantze orokorra egin du, kritikatuta “pandemiaren aurrean Gobernuak ez duela behar besteko ahalegina egin”.
Zehaztu du ere ez dela “bere burua gainditurik ikusi duen Lehen Arreta indartu” eta aurrekontuetan osasungintzan egitea aurreikusten den inbertsioa ez dela behar bezain bestekoa, “KPIa baino txikiagoa” delako 2022ko kontu orokorretan arlo honi ematen zaion igoera.
Gauzak horrela prebentzioan eta zaintzan ahalegin handiagoa eskatu du gaurkoan LABek Parlamentuaren atarian eta zehazki bigarren atal horrekin harreman zuzena du erregistratutako eskaerak. Izan ere bereziki COVID19a dela eta etxeratutako haurren zaintza errazteko neurriak eskatu dituzte.
Tartean argudiatu dute ohikoa dela “haurra konfinatzea eta gurasoek zaintzarako inongo baimenik ez izatea” eta modu horretan sarri “prebentzio neurriak alboratu” behar dituztela “adibidez aiton-amonekin utzita”. Horregatik eskatu dute langile publikoek duten eskubide bera gainontzeko langileei aplikatzeko, hau da “haurrak zaintzeko baimena zabaltzeko”. Azkenik Gobernuari exijitu diote "patronalarekin eseri dadila baimen hori aplikatzen hasteko".
