ELAk parodia baten bidez salatu du Nafarroako Parlamentuaren aurrean "abenduaren 23an PSNk, Geroa Baik, Podemosek eta EH Bilduk 2022ko Aurrekontua aurrera ateratzen dutenean eta zerga-politika eskasa eta bidegabea aldatu gabe jarraitzen denean, enpresen, elite ekonomikoen, lobby erlijiosoen eta CEN, UGT eta CCOOren interesek jarraituko dutela onuradun izaten". Sokatira irudikatuz salatu nahi izan dute "gobernuak interes horiek saritzen jarraitzea" erabaki duela, "osasuna eta hezkuntza publikoa indartzearen, aldi baterako enplegu publikoa kontsolidatzearen, Errenta Bermatua indartzearen, azpikontratazioak iraultzearen edo zaintzarako sistema publiko eta doakoa sortzearen alde egin beharrean".
Sindikatu independentistaren aburuz, "2022an panorama beltza izango da langile klasearentzat, gizarte-premiei erantzuten ez dien aurrekontu bat onartuko delako". Prentsa oharrean azaldu dutenez, aurrekontua zorrak eta itzaleko bidesariak mugatutakoa da, "Europako funtsak jasotzen dituena pentsioen murrizketen eta lan-erreforma bat egiteko baldintzapean". Halaber, "UGT, CCOO eta CENen funts publikoen bidezko finantzaketa berreskuratzen da, eta Miguel Sanzen eta Yolanda Barcinaren garaietatik ez zen horrelakorik gertatzen".
