Gaurko Metropoli Forala saioan, Ezkababa ikastetxeko Lehen Hezkuntzako 6. mailako ikasleak izan ditugu bidelagun, zehazki F, E eta D geletako kideak. Ederki gozatu dugu gure entzuleentzako prestatu dituzten albisteak, txisteak, asmakizunak eta bertsoak entzunez. Ezkabako ikasle ohi Saioa Alkaizak Nafarroako Bertsolari Txapelketa irabazi berri duen honetan, bertsolaritzak tarte zabala hartu du haien solasean.
Ikasleez gain, gurekin izan dira Jaione Altuna zuzendaria eta Ana Ocon ikasketa burua, ikastetxearen historiaren eta egungo egoera eta metedologiaren berri ematen. Guraso Elkarteko Mari Jose Arteagarekin eta Sortzeneko Marta Diezekin, besteak beste, jardunaldi jarraituaz mintzatu gara. Ana Unanue LHko 3. mailako irakasleak Leire Urbeltzekin prestatzen ari diren orma irudia izan du hizpide.
Ikastetxetik kanpoko eragile antsoaindarrak ere gonbidatu ditugu saiora. Esate baterako, udaleko Gazte eta Kultur zinegotzi Ibai Anton, gazte mugimenduko Beñat Remon eta Txokogorri Elkarteko Ana Sada.
Saioa Antsoaingo Euskararen Astearen karietara egin dugu. Astea azaroan ospatu zen. Baina Euskalerria Irratiaren egutegi arazoengatik, saioa ezin izan da gaur arte egin.