Luis Azanza argazkilari iruindarrak atzo, asteartearekin, eman zuen azken hatsa, 60 urte zituela, minbiziak jota.
Berrogei urtez jardun zuen argazki-kazetaritzan, 20rekin hasi baitzen lanean, 80ko hamarkadaren hasieran. Hainbat hedabidetan egin izan zuen lan. Besteak beste, Euskaldunon Egunkaria, Deia eta El Pais berripaperetan, beti Nafarroatik mundura. Honatx, bere webgune pertsonalean, bere argazkirik onenen antologia bat.
Argazkilari fina zen, ingurua erretratatzeko gaitasun berezikoa, eta fotografiatzen zituenekin zein lankideekin konektatzeko erraztasun handikoa. Tratuan, oso gizon atsegina zen, irribarrea beti ahoan.
Berta Bernate bikotekidearekin batera, Aloa Comunicación agentzia sortu zuen. Eta horren baitan, eta jada gaixo zelarik, azken hamar urteotan ilustrazioa landu zuen.
