Nafarroako Gobernua eta Espainiako Gobernua aurreakordio batera iritsi dira duela sei urte baino gehiagotik berritzen ez zen Estatuaren eta Nafarroaren arteko Hitzarmen Ekonomikoaren Legea eguneratzeko. Administrazioen arteko adostasun horrek bermatuko luke Nafarroak luzaroan eskatutako helburu bat lortzea.
Foru agintaritzak azaldu duenez "irailean hasi ziren negoziaketa lanak". Aurreikusita dago Negoziazio Batzordea abenduaren 20an, astelehena, egitea, eta, aldez aurretik, batzorde horren Nafarroako ordezkaritza batzartuko da, aurre-akordioaren informazio guztia jaso eta haren edukia aztertu ahal izateko.
NFEBHLOko (LORAFNA) 45. artikuluak eta Foru Parlamentuko Araudiko 170. artikuluak adierazten duten bezala, honako mugarri hauek bete beharko dira Hitzarmenaren errebisioa gauzatu dadin:
1. Estatuko eta Nafarroako ordezkariek osatutako Negoziazio Batzordearen akordioa. Egun berean, Koordinazio Batzordea ere egingo da, beharrezko eta aldi bereko akordio batzuk onartzeko.
2. Nafarroako Gobernuaren Erabakia: Negoziazio Batzordeak izenpetutako Akordioa Nafarroako Parlamentura bidaltzea onesten duena.
3. Ministroen Batzordearen erabakia, Hitzarmen Ekonomikoaren Legea aldatzeko lege-aurreproiektuari buruzkoa. Espainiako Gorteetara bidaliko dute ondoren, irakurketa bakarreko lege gisa izapidetzeko.
4. Espainiako Gorte Nagusiek Hitzarmen Ekonomikoa aldatzeko Legea onartzea.
