Mitxel Lakuntza ELA sindikatuko zuzendari nagusi berrautatu berriak Metropoli Forala saioan azaldu duenez, zerga politika aldatu gabe ez dago Nafarroako Gobernuaren politika aldatzerik. Eta hori horrela, Txibiteren exekutiboak koalizio independentistarekin loturiko akordioa balio urrikotzat jo du. “Ez dugu ulertzen zergatik dioten EH Bilduko ordezkariek balio politiko handikoa dela, ez baitu deus aldatzen”.
ELAko buruaren aburuz, egungo fiskalitatea Barcinak zerabilen bera da, gastu sozialetan ez da aurrera egin, eta euskararen alorrean atzera egiten ari da. Hori horrela, EH Bilduk Iruñean zein Gasteizen duen jarrera kezkagarritzat jo du, “sindikatuek ezkerreko indar eraldatzaile bat behar dutelako erakundeetan”.
Lakuntza botoen %90arekin berrautatu dute idazkari nagusi, joan den astean Bilbon egindako XV. kongresuan. Hartan, aklamazio bidez onartu dute Euskal Errepublika Konfederala xedetzat finkatzen duen ponentzia politikoa. Aldaketa historikoa da, ELAk 1979an autonomismoaren alde egin zuen eta: “Errealistak gara, badakigu euskal errepublika ez dagoela hurbil, baina helburuak finkatu egin behar dira estrategia egokiak diseinatu ahal izateko”.
Lakuntzaren irudikoz, Espainiako Diputatuen Kongresuko lan eta pentsio erreformek murrizketak ekarriko dituzte. Horren aitzinean ez du greba orokorrera deitzeko aukera baztertzen, baina gaineratu du huelga helburu zehatzekin egin beharko litzatekeela.