Estatuko aurrekontuen zuzenketen artean, Espainiako Diputatuen Kongresuak 200.000 euroko zuzenketa onartu du Burgos, Gasteiz, Iruñea eta Zaragoza lotzen dituen trenbide sarea hobetzeko. Honela, era guztietako trenek erabili ahalko dute azpiegitura, pertsona eta merkantziak garraiatu ahal izateko. Nafarroa Trenaren Alde Plataformak txalotu du inbertsioa eta azpimarratu du horrelako liniek inbertsio kostu txikia dutela Abiadura Handiko Trenarekin alderatuta eta erabilgarritasun handiagoa herritar eta tokian tokiko enpresendako.
"Nafarroan trena hiltzen ari da pixkanaka" salatu dute plataformako kideek, "Herrietako geltokiak itxi eta trenen maiztasunak urritzen ari dira". Gogoratu dute, AHT-ak behar duen azpiegiturarekin alderatuta, tokiko trenbide sare txikia ingurugiroarekiko jasangarriagoa dela. Horregatik, Abiadura Handiko Trenaren eraikuntzan dirua ez xahutzera eta obrak gelditzera dei egin dute.