50 eragile baino gehiago izan dira azken hilabeteotan Nafarroako Parlamentuan klima aldaketaren lege proposamena landu duen batzordean. Ekarpenak entzunda osoko zuzenketa aurkeztea edo ez zalantza izan du EH Bilduk. "Elkarrizketaren alde" egitea erabaki du alderdi independentistako Adolfo Araizek eta Laura Aznalek gaur azaldu dutenez.
68 artikulu ditu legearen zirriborroak, eta EH Bilduk 123 zuzenketa aurkeztu dizkio: 63 ebazpen berriak, 50 testua aldatzeko proposamenak dira eta 5 ezabatzaileak. “Dituen hutsuneak eta isiluneak gainditu nahi ditugu, parte hartzea eta anbizioa gehitzeko", azaldu dute.
Lau alorretan banatu daitezke zuzenketak. Helburu klimatikoak ongi finkatzea du helburu lehenengo atalak, bigarrenak gobernantza ereduaren ingurukoak biltzen ditu, hirugarrenak finantziazio berria eskatzen dutenak jasotzen ditu eta laugarrenak, berriz, trantsizio "justuago" bati egiten dio erreferentzia. Horien artean, zerga sistemari lotutakoa da alderdiarentzat "erabakigarriena". Ez bada aldaketa "esanguratsurik" ematen, EH Bilduk ez dio gobernuari bere aldeko botoa ziurtatzen. Gobernuari bilera eskatu dio EH Bilduk horien gainean eztabaidan hasteko.