Aurtengoak dituen diru partidak mantendu ditu gobernuak aurrekontu proiektuan; EHNE sindikatuarentzat oinarrizkoak diren gazteak sektorean hasi ahal izatekoa eta ustiategietako hobekuntza-planei buruzkoa, esaterako. Eremu kaltetutako profesionalei zuzendutako laguntza berriz 5 milioitik 8ra igo dute. Hala "jarrera baikorra" azaldu du kontuekiko sindikatuak, baina hiru zuzenketa proposatu dituzte.
Abeltzaintzako toki azpiegituretarako inbertsioen partida handitzeko zuzenketa prestatu dute. Baita bi partida berri sortzekoa ere: lehenengoa, fauna basatia kontrolatzeko erabiliko litzateke; bigarrenak, berriz, lehengaien prezioen igoera arindu nahi du. Igoerak kaltetutako ustiategietara bideratutako 3,5 milioiko laguntza sortzea nahi du sindikatuak. Nafarroako gobernua sustengatzen duten taldeekin eta EH Bildurekin bildu da zuzenketak aintzat har ditzaten.
Zuzenketetan bildutako hobetzekoez gain, beste kritika bat ere egin diote: lehen sektorera bideratutako aurrekontuaren heren bat Nafarroako Kanalera bideratutakoa da. Azken urteotan nekazaritza eta abeltzaintza iraunkorraren aldeko jarrera hartu du gobernuak, eta bide horretan jarraitu nahi izanez gero, azienda estentsiboari bide eman behar diotela ohartarazi dute.