Iruñeko eta Tuterako Artzapezpikutzaren eta Espainiako Armadaren arteko harreman horrek norabide batean zein bestean funtzionatzen du. Izan ere, Iruñeko eta Tuterako egungo artzapezpikua, Francisco Perez, 2007ko uztailean Nafarroara iritsi aurretik hain zuzen ere Espainiako Armadako artzapezpikua izana zen.
Ezin ahantzi Franciscco Perezen aurretik Fernando Sebastianek jardun zuela Iruñeko eta Tuterako artzapezpiku moduan, eta euskaldunon hiri buruzagia mundu osoko intsumisioaren hiriburua zen garai haietan, behin baino gehiagotan egin zituela intsumisoen aurkako adierazpenak.
Bidenabar esanda, Francisco Perezek 75 urte beteko ditu urtarrilean. Eliza Katolikoaren barne arautegiaren arabera, une horretan bere kargua aita sainduaren esku utzi beharko du.
Juan Antonio Aznarez 1961eko urtarrilaren 14an jaio zen Eibarren (Gipuzkoa), baina 13 urte zituela Tuterara (Nafarroa) joan zen bizitzera. Elizako ikasketak Iruñeko apaiztegi nagusian egin zituen eta 1990eko urriaren 27an apaiztu zen.
Bibliako Zientzietan lizentziatu zen Erromako Institutu Biblikoan (1997). Gainera, Filosofia eta Letretan (Filologia Hispanikoa) lizentziatua da Zaragozako Unibertsitatean (1984).
Iruñeko eta Tuterako elizbarrutian garatu zuen apaiz ministerioa, eta 2012ko ekainaren 9an izendatu zuten apezpiku laguntzaile. Gotzain-ordenazioa urte bereko irailaren 9an jaso zuen. Espainiako Gotzainen Batzarrean Liturgiarako Gotzainen Batzordeko kide da.
