Mila lagun inguruk parte hartu dute Izadi hiru urtetik beherako neskatoaren gurasoen eta lagunen plataformak antolatu duen kalejiran.
Izadiren gurasoak, Maria Lizarraga eta Iñigo Gutierrez, preso daude, Aranjuezko espetxean. Amarekin bizi da Izadi. Baina Izadik urtarrilaren 21ean hiru urte beteko ditu, eta orduan gurasoengandik bananduko dute, espetxeetako barne arautegiak zehazten duenez.
Larunbateko martxa lau eta erdiak jota abiatu zen Burlatako Udaletxe plazatik, Hilarion Eslaba karrika eta Kale Nagusia zeharkatu eta gero, Kultur Etxera iristeko.
Han, ia mila lagunez gain, Burlatako joaldunak, Donibaneko erraldoiak, buruhandiak eta txaranga bat izan dira.
Familiaren lagunen plataformak hiru urte betetzen dituenean Izadi gurasoengandik ez banantzea eskatzen du, eta adingabearen eskubideak zaintzeko eskatu dio Espetxe Erakundeari, familiarengandik bananduta egon gabe hazi behar baitu.