Espainiako Barne Ministerioak eman du datua, kriminalitateari buruzko txostenean: sarketarekin egindako sexu erasoek hazkunde handia izan dute urteko lehen hiru hiruhilekoetan: 25 izan dira, aurreko urtean baino 14 gehiago. Esan gabe doa Covid 19aren aurkako murrizketek goitik behera markatu zutela 2020 urtea.
Batez besteko kriminalitate tasa Nafarroa Garaian 38,5 urraketa penalekoa da, 1.000 biztanleko. Espainiako batez bestekoa puntu bat handiagoa da, 39,6koa hain zuzen ere. Delitu gehienetan gorakada izan da joan den urtearekin alderaturik, baina hazkunderik handiena sarketarekin egindako sexu erasoena izan da. Nolanahi ere, askatasun eta identitate sexualaren aurkako gainontzeko erasoek %12 egin dute behera.