Delitua aitortu, damua zaladu eta barkamena eskatzen duen lehen aldia da. Orain arte, behin eta berriz ukatu izan baitu gertaturikoa bortxaketa izan zela. Behin eta berriz jarri du kolokan biktimaren sinesgarritasuna eta, hartara, biktimaren biktima izaera bera.
Prendari hamabost urteko espetxe zigorra ezarri zioten. Zigorraren laurdena bete du. Eta baimenak eskatzen has daiteke. Baimen horiek eman ala ez erabakitzeko tenorean, espetxeko tratamendu batzordeak faktore positibotzat baloratu ohi ditu delituaren onarpena eta barkamen eskaera. Adituen arabera, ez da ezinbesteko baldintza, baina asko lagun dezake.
Auzitegira bidalitako idazkia Prendaren inguruak filtratu die komunikabideei, espetxeko tratamendu batzordeak Prendaren bi baimen eskaerari ezetz erantzun eta gero.
Bistan da Prendak eta bere inguruak biktima beste behin ere atentzio mediatikoaren fokupean jarri dutela. Eta hala bir-biktimizazioa eragin diotela, horrek dakarren sufrimendu guztiarekin.
Bistan da hedabideek beste behin ere amua irentsi dutela eta Prendaren jokoan sartu direla. Edo sartu garela, gu geu ere honetaz ari baikara, gertatu dena ahalik eta zorrotzen azaltzen saiatu bagara ere.
