Leitza eta Iruñea arteko autobus zerbitzuak bikoiztuko dituzte

Leitzako Udaleko eta Nafarroako Gobernuko ordezkariak, bilera batean.

Bidaien maiztasuna handituko dute eta igande eta jaiegunetan autobus zerbitzua eskaintzen hasiko dira. Leitzarrek sarritan salatu izan dute herriko autobusen maiztasunak eta ordutegiak "urriak eta desegokiak" direla. 

Leitza eta Iruñea arteko autobus zerbitzuak bikoiztu egingo dituzte datorren astelehenetik aurrera. Zerbitzu berriak igandeetara eta jaiegunetara luzatuko dituzte, orain arte garraio publikorik eskaintzen ez zen egunetara, eta astelehenetik larunbatera maiztasuna handituko dute

Horrela, Leitzako herritarrek autobus frekuentzia berriak izango dituzte, garraio publikoaren zerbitzua hobetuz. Berregituraketa hori Leitzako Udalak eskatu du, eta Garraioa eta Mugikortasun Jasangarriak kordinatuko du, inplikatutako enpresekin. Behin-behineko irtenbide gisa ezarriko dute, eta doikuntzaren bat egin ahal izango da, garraio zerbitzuaren emakida berria martxan jarri arte.

Zerbitzu gehiago, igandeak barne

Iruñea eta Leitza lotzen dituen autobus lineak, Leizaran enpresak artatuak, bi joan-etorri zerbitzu ditu, astelehenetik larunbatera, 13:00etan eta 19:30ean. Berrantolaketaren ostean, 13 00etan eta 18:00etan egingo dituzte irteerak hiriburutik.

Leitza eta Iruñea arteko itzulerako espedizioei dagokienez, gaur egun bi zerbitzu ematen dituzte soilik astelehenetik larunbatera, Leitzatik 07:50ean eta 15 30ean, astelehenetik ostiralera, eta larunbatetan, 09:00etan eta 15:30ean. Bidaia horiei beste bi gehitu behar zaizkie: Leitzatik 11: 10ean eta 21: 30ean irtengo dira. Horrez gain, igande eta jaiegunetan, orain arte zerbitzu hori ematen ez zen egunetan, Leitzatik 21:30ean irtengo den ibilbide bat egingo dute. 
 
Aldarrikapen zaharra

Leitzako Udalak sarritan salatu izan du autobusen maiztasunak eta ordutegiak "urriak eta desegokiak" direla, eta horrek herritik kanpora joan behar duenak garraio pribatua erabili behar izatea dakarrela.

Egoerak okerrera egin du pandemia hasi zenetik, Nafarroako Gobernuak zerbitzua gehiago murriztu baitu. Hori dela eta, sinadura bilketa bat egin zuten, gobernuari autobusen hiriarteko garraio publikoaren zerbitzu berri bat martxan jar dezan eskatzeko.

Hilaren 29an Parlamentuko lan saio batean parte hartuko dute, eta han aurkeztuko dituzte sinadura guztiak, eta ondoren, baita Gobernuan ere.