Astebete baino gutxiago falta da Noaingo batailaren 500. urteurrenerako: ekainaren 30ean izango da. Testuinguru honetan, gero eta gehiago dira dataren inguruan antolatzen ari diren ekitaldiak, batez ere larunbat honetarako, hilaren 26rako.
Jakina da VOX alderdiak ere berea aurkeztu zuela asteburuan, sare sozialen bitartez. Noaingo Bataila elkarteak berea antolatutako egun, ordu eta leku berean egin nahi du ekitaldia, 11:30ean, Noaingo bataila gogoratzeko monumentuan. Noaingo Bataila elkarteak ordu horretan bertan deitua du lore eskaintza eta pregoia.
Horiek horrela, Getzeko kontzejuak erabaki zorrotz bat hartu du: Noaingo bataila gogoan hartzen duen monumenturako sarbidea galarazi die guztiei. Gatazkarik ez sortzeko eta herritarren segurtasuna bermatzeko erabaki duela argudiatu du ohar bidez.
Gaur prentsaurrekoa eskainiko dute Noaingo batailaren oroimen ekitaldien antolatzaileek, Getzeko kontzejuaren neurriaz duten iritzia azaltzeko. 29 urte dira ekitaldia antolatzen dutela.