Atzotik Nafarroako herritarrek COVID digitala izeneko ziurtagiria eskuratu ahal dute, eta horrek bere Europar Batasuneko lurraldetik mugitzea erraztuko du; izan ere, titularrak COVID-19ren aurkako txerto baimenduren bat jaso duela, gaixotasunetik berreskuratu dela edo EBk baliozkotutako proba bat egin duela egiaztatu beharko du.
Nafarroa izango da aukera hori eskainiko duen lehen erkidegoetako bat. Ziurtagiria osasuneko karpeta pertsonalaren bidez eskuratu daiteke, gailu mugikor batean gorde ahal izateko. Eta, aste honetan, osasun zentroetako administrazio zerbitzuetan aurrez aurre ere izapidetu ahal izango da. Lehen mailako osasun langileek arreta emango diote eskatzaileari, eta, hala eskatzen badu, paperean ere emango diote. Asmoa, hala ere, formatu digitala eta osasun karpeta sustatzea da, dagoeneko 171.000 lagunek erabiltzen dutelako eta alta ematea erraza delako.
Ministerioarekin eta Europar Batasunarekin batera garatutako ziurtagiria OsasunbideKO informazio sistemen taldeek eta Unibertsitate, Berrikuntza eta Eraldaketa Digitaleko Departamentuko Osasun Teknologien Zerbitzuak landu dute Nafarroan. Bai bertsio elektronikoan, bai paperean, sinadura digitaleko QR kode bat dauka, ziurtasun osoz egiaztatzen duena ziurtagiriaren benetakotasuna, osotasuna eta baliozkotasuna, eta, aldi berean, dokumentuaren faltsutze posibleetatik babesten du.
Informazioa Nafarroan hizkuntza ofizialetan, gaztelaniaz eta euskaraz emango da, baita ingelesez ere.
