Nafarroako Gobernuak, asteazkeneko saioan, Foru Lege Dekretu bat onartu zuen, ostalaritza, kirol federazio eta joko alorretan laguntza fiskalak emateko neurriekin. Horren bidez, koronabirusaren osasun krisiak sektore horietan izan duen eragina murriztu nahi du. Orain, Nafarroako Parlamentuak berretsi behar du foru lege dekretua.
Laguntza fiskal berriek gutxienez bost milioi euroko kostua izango dute Foru Ogasunarentzat. Gastu horren erdia, -2,6 milioi euro, gutxi gorabehera- makina txanpojaleengatik gutxiago ordaintzearen ondorioz sortuko da.
Dekretuak ezartzen du murriztu egingo direla jokoaren gaineko hiruhilekoko zergak, ostalaritzako establezimenduetan edo joko aretoetan instalatzen diren jolas makinengatik ordaindu behar direnak. Era berean, kalte ekonomikoak konpentsatzeko emandako laguntzak PFEZ eta Sozietateen Gaineko Zerga ordaintzetik salbuesten dira.
Ogasunaren kalkuluen arabera, joko makinak ustiatzeagatik jokoaren gaineko zergengatik aurtengo bigarren, hirugarren eta laugarren hiruhilekoetan ordaindu beharreko kuotak %50 murrizteak 2.605.710 euro gutxiago biltzea ekarriko du. Ostalaritzarako, turismorako, gaueko aisialdirako eta sektoreetarako laguntzak PFEZean eta Sozietateen Gaineko Zergan salbuesteari dagokionez, Ogasunak onartu du ez dela erraza kostua zenbatestea.