PSN, Geroa Bai, EH Bildu, Ahal Dugu eta Izquierda Ezkerrako talde parlamentarioek proposatu dute aldaketa, eta Nafarroako Gobernuak bere adostasuna adierazi du.
Indarrean dagoen 68. artikuluak dio, hitzez hitz, kargu publikodun hautetsi batek modu frogagarrian jakiten duenean epaitegi edo auzitegi eskudun batek ikertu egoera ezarri diola, ustez Zigor Kodean jasotako delituren bat egiteagatik, ulertuko duela kargu publikoa ez dela bateragarria herritarrei helarazi beharreko konfiantzarekin.
Orain, proposatu duten aldaketa nagusia da, goi-kargudun bati jakinarazi zaionean ahozko epaiketa ireki dela edo behin-behineko espetxeratzearen kautelazko neurria hartu dela, Zigor Kodean aurreikusitako Herri Administrazioaren aurkako delituren bat egin duelako; orduan bai, karguari uko egin beharko diola. Hori egin ezean, izendatu zuen pertsonak hiru egun naturaleko epean kendu beharko du kargutik.