350 biztanle inguru dituen Lekarozko herrian hotela, golf zelaia eta 225 luxuzko etxebizitza egiteko obrak abiatu ditu Palazio de Aroztegia SL enpresak. Bailaran etxebizitzaren inguruan dagoen arazoa okertuko du proiektuak taldeen ustez: "Ez dezagun atzendu Baztango etxeen %36a etxe hutsak edo bigarren etxe bizitzak direla. Beraz, parke tematikoaren itxura eman dioten proiektu honek herri baten desagerpena ekarriko du".
Nafarroako Gobernuak Aroztegiako proiektua udalerriz gaindiko eragina duen plana gisa bideratzea erabaki zuen. Modu honetan, Baztango Udalari erabakitzeko eskumena kendu zion. Baztango instituzioak proiektu honen aurka agertu dira. "Urteak daramazkigu herri bezala proiektu honen kontra gaudela adierazten eta ez gaituzte entzun nahi. Honen aitzinean, Nafarroako Gobernuari eta bera babesten duten alderdi guztiei, zilegitasun sozialik ez duen UGEP hau geratzeko eskatzen diegu".
Ostiral honetan, arratsaldeko 15:30ean Lekarozko Plazan akanpada bat eginen dute, eta larunbatean arratsaldeko 17:00etan elkarretaratzea eginen dute. Bestetik, maiatzaren 15ean arratsaldeko 17:30ean manifestazioa bat eginen dute Elizondon.