Nafarroak apirilaren 22ra arte luzatu ditu murrizketak

Milagroko itxiera perimetrala apirilaren 15era arte luzatzea erabaki dute, eta neurri hori bera ezarriko dute Cadreitan, bi asteko iraupenarekin.

Egoera epidemiologikoa ikusita, Nafarroako Gobernuak apirilaren 22ra arte (osteguna) luzatzea erabaki du, bai ostalaritzaren itxierari eta edukiera-mugei dagokienez hartutako azken neurriak, Osasuneko kontseilariaren foru-agindu batean jasotakoak, bai mugikortasunari eta eremu publiko eta pribatuko bilerei dagokienez, lehendakariaren Foru Dekretuan jasotakoak.

Gainera, apirilaren 15era arte luzatuko dira, Milagroko udalerrirako hartutako ezohiko prebentzio-neurriak barne, eta ezohiko murrizketak onartuko dira COVID-19aren hedapena geldiarazteko Cadreitan, azken egunetan hautemandako kasuen gorakada dela eta. Mugak luzatu, aldatu edo ondoriorik gabe utzi ahal izango dira, egoera epidemiologikoaren arabera.

Neurri horiek COVID-19ari eusteko Nafarroako Gobernuaren estrategia globalaren barruan sartzen dira, eta, besteak beste, bi ardatz nagusi jasotzen ditu: erakunde- eta erkidego-lankidetza udal-agintaritzekin, eta testuinguru eta egoera zehatz bakoitzari egokitutako neurri selektiboak aplikatzea, bai eta eremu orokorreko arau eta neurriak ere.

Indarrean dauden neurriak

 Indarrean dauden neurriei dagokienez, ostalaritzaren barnealdea eta jarduera oro ixten jarraitzen da, bingoetan, joko-aretoetan eta jolas-aretoetan; azalera ertain eta handietako merkataritza-edukiera % 30ekoa da oraindik (ezin izango da eremu komunetan egon, ezta jolas-guneak erabili ere), eta % 50ekoa saltoki txikietan.

Gainera, gaueko mugikortasunaren murrizketak indarrean jarraitzen du, eta 23:00etatik 6:00etara debekatuta dago erkidegoaren perimetroa igarotzea eta eremu publikoan eta pribatuan bilerak mugatuta daude.

Gehienez 6 pertsona egon daitezke espazio publiko irekietan, eta 4 pertsona espazio publiko itxietan, bizikidetza-unitate bereko pertsonen kasuan izan ezik. Eremu pribatuan, bilerak bizikidetza-unitatera mugatzen dira.

Bien bitartean, beste hiru herri perimetralki itxi ditu gobernuak. Milagroko itxialdia astebete luzatu du, Argedas bi astez izanen da itxita. Hirugarrena, zerrendara gaur gehitu dena Cadreita da.

 

Cadreitako Udalak, Nafarroako Gobernuko Osasun Sailarekin koordinatuta, herria perimetralki konfinatzea erabaki du, bihartik eta 22ra. Horrez gain, 30 eta 75 urte bitarteko biztanleei baheketa egitea erabaki du, antigenoen proben bidez, hilabete honetan kasuak ugaritu direlako. Baheketa ostegunean, hilak 8, egingo da Udal Kiroldegian eta hitzorduak Osasun Sailetik telefonoz deituta egingo dira.