Parlamentuan ez bezala, Zabalza auzia ikertzearen aurka egin dute UPNk eta PSOEk Kongresuan

Kongresuak uko egin dio Mikel Zabalzaren heriotzari buruzko dokumentuak desklasifikatzeko eskatzeari, PSOEk EAJren proposamena baztertu ostean.

Mikel Zabalzaren heriotzari buruzko dokumentu sekretuak desklasifikatzeko eskatu zion EAJk Gobernuari, baina EAJk aurkeztutako proposamena ez da aurrera atera Espainiako Kongresuan. Aldeko 74 boto jaso ditu, kontrako 274 eta abstentzio bat. Euskal Herriko eta Kataluniako alderdi independentistek eta Unidas Podemosek alde egin dute, eta PSOEk, PPk, Voxek, Ciudadanosek, UPNk eta beste diputatu solte batzuek kontra.

PSOEk asteazkeneko eztabaidan atzera egin zuen mozio horretatik, eta zuzenketa bat proposatu zuen, non ez zen desklasifikazioa eskatzen eta, oro har, 1985ean Guardia Zibilak atxilotutako orbaiztar gaztearekin gertatutakoaren egia ezagutzea nahi zuen. EAJk ez du aukera hori onartu, Estebanek "pilatos zuzenketa" dela esan ostean.

Gaiak EAJ eta PSOEren arteko liskarra sortu du medioetan. Bi alderdiek elkarri aurpegiratu baitiote euren iragana gai horren inguruan. Denis Itxaso Espainiako Gobernuak EAEn duen ordezkaria izan da hitz egiten lehena, Radio Euskadin: "EAJk ez digu berritasuna zein den azaldu. Bada audio bat, aspaldidanik espedientean txertatuta dagoen testu bati ahotsa jartzen diona. Beraz, nire ustez, pilota EAJren teilatuan dago oraindik ". Beste "froga zorrotz eta ozen" batzuk aurkezteko erronka egin dio, baldin baditu.

1985ean EAJk kasua salatu zuen Kongresuan, baina garai hartan Herrizaingo Saila kudeatzen zuen alderdia ere bazen, orduan Luis Maria Retolaza sailburu zela eta Jose Antonio Ardanza lehendakari zela. Ez dago jasota Guardia Zibilaren kuartelaldian gertatzen ari zena benetan ikertu zenik.

Ordu batzuk geroago ETB-2n egindako elkarrizketan, Aitor Esteban haserre agertu da Itxasoren kokapenagatik. EAJri gaiari buruzko frogak eskatzea "zinismoaren eta hipokrisiaren gainbehera" dela esan du, eta "karadurei" dagokiela gaineratu du.