Nafarroako Gobernuak onartu ditu Aste Santurako neurriak luzatzeko Foru Agindua eta Foru Dekretua, baina "egoera egunez" egun aztertuko dutela ohartarazita, beharrezkoa bada, neurriak gogortzeko.
Santos Indurain Osasun kontseilariak ohartarazi du egoera epidemiologikoa korapilatzen ari dela, eta arrisku ertainetik arrisku altura igarotzeko bidean dela. Izan ere, iragan astean kasuak %54 hazi ziren aurrekoarkein alderatuta, ospitaleratzeak 34tik 42ra igaro ziren, positibo tasa %5etik gora dago, eta aldaera britaibniarra nagusitu da dagoeneko, %85era iritsita.
Horiek horrela, kontseilariak kezka agertu du: "Laugarren olatuaren atarian gaude, eta lortu behar dugu kontrolatzea".
Hala ere, itxaropenerako arrazoiak ikusten ditu, txertaketa kanpainak aurrera egiten duelako. Une honetan, zentratuta daude kanpainaren bigarren etapa bukatzean, presona nagusienen immunizazioa lortzeko. Azaldu duenez, apirilaren hasierarako 80 urtetik gorako populazioaren osotasuna txertatua izatea lortuko dute.
Sare publiko eta pribatuko osasun langileek, eta kontaktu handiko lanak dituzten beste profesional batzuek ere txertoa jasoko dute datorren hilaren hasierarako. Aste Santuaren itzuleran, 70 eta 79 urte bitartekoei emango diete lehentasuna, eta horiei batuko zaizkie beste kolektibo zaurgarri batzuk. Baina aurki beste agerraldi bat eskainiko dute, xehetasun guztiak emateko.
