'Gazteok non? etxebizitza eta gazte emantzipaziorako proposamen bat' txostena aurkeztu du Ernaik astearte honetan Iruñeko parlamentuen aurrean.
"Gazteak larrialdi egoeran gaude. Pandemiak are zaurgarriago bihurtu gaitu, baina egiturazko arazo bati buruz ari gara", adierazi dute. Prezio altuek eta prekarietateak etxebizitzarako eskubidea zaildu dutela argudiatu dute, eta azpimarratu dute gazteek soldataren zati handi bat etxebizitza ordaintzera bideratu behar dutela. Hego Euskal Herriko emantzipaziorako bataz besteko adina 30 urte ingurukoa da; Europan, aldiz, 26 urtekoa.
"Alokairu soziala" eta "etxebizitza publikoak" beharrezkoak direla azaldu du Ernaik.. Alokairua ordaindu ahal izateko gazteentzako diru laguntzak eskatu ditu, "alokairura gazte baten diru sarreren %15a gehienez" bideratzeko. Hala, "bestelako etxebizitza eredu edo proiektuak sustatzea" exijitu du Ernaik, "bizi eredu komunitarioa" oinarri.
Etxegabetzeak gelditu behar direla iritzi du Ernaik, astelehen honetan 23 urteko gazte etxegabe bat Bilbon hil zela gogoratuz. Okupazioa irtenbide gisa kokatzen du ere, etxebizitzaren eskuragarritasun ezaren aurrean dagoen alternatiba errealen faltagatik, "hautu legitimo bezain beharrezkoa" iruditzen zaie. Okupazioaren despenalizazioa aldarrikatu dute .