Arrazakeriaren Aurkako Nazioarteko Eguna ospatu zen atzo, eta hiri gehienetan manifestazioak eta bestelako aldarrikapen ekintzak antolatu zituzten. Iruñean, Nafarroako Koordinakunde Antiarrazistak deituta, manfiestazioa egin zuten, Eskubide guztiak denontzat lelopean.
Protesta Baluarteko plazatik abiatu zen, eta Gazteluko Plazan amaitu, han manifestu bat irakurrita. Ibilbidean oihukatu zituzten aldarrikapenen artean izan ziren "Bertakoa edo atzerritarra, langile klase bera" edota "Europak eskuak zikinduta ditu".
Ibilbidean zehar zenbait testigantza kontatu zituzten, eta eguneroko bizipenak adierazi zituzten; salatu zuten, adibidez, afrikar jatorrikoak izateagatik ez dizkietela etxebizitzak alokatzen, edo poliziek egunean hainbat aldiz gelditzen dituztela.
Hala, autobus geltokiaren ondoan salatu zituzten "poliziaren arraza profilagatiko kontrolak", Espainiako Ordezkaritzaren aurrean eskatu zuten "paperik gabeko pertsonak legeztatzea", eta Diputazioaren aurrean "etxebizitza bat alokatzeko dituzten arazoak".