Nafarroak 70 koronabirus kasu berri atzeman zituen atzo, aurreko egunean baino 30 gutxiago, Nafarroako Gobernuaren behin-behineko informazioaren arabera. Asteartean ehun kasuren langa gainditu zen. Atzoko datuek ez diote gorakada horri jarraitu, beraz; baina, hala ere, joan den asteko epe berari begira, 170tik 237ra igo dira kasuak.
Horiek horrela, osasun agintariek zuhurtziaren printzipioa betetzearen premia azpimarratzen dute. Hain zuzen ere, atzo sartu ziren indarrean San Jose zubirako neurri murriztaileak, hilaren 21era arte indarrean egongo direnak, eta Aste Santuan ere aplikatuko direnak.
Espazio publiko itxietako bilerak gehienez lau pertsonakoak izango dira, eta seikoak espazio publiko irekietan, eta topaketa pribatuak bizikidetza unitate bakar batera mugatuko dira.
Era berean, leku publikoetan egiten diren bilerak eta aldi horretan egiten diren manifestazioak baldintzatu edo debekatu ahal izango dira, deitzaileen aurretiazko jakinarazpenean ez bada bermatzen kutsadurei aurrea hartzeko behar den distantzia pertsonala.
